Friday, July 24, 2009

كلاب


يا كلااااااااااااااااااااااااااااااااااااااااب

Monday, March 3, 2008

سيدي عَ غباوة غباوة

سيدي ع َغباوة غباوة دي بلدي و نجاوة نجاوة ,,,يابا اه اه اه


حمار يا خواتي حمار طب انا مش فاهمه لحد دلوقتي اللي حصال لي و اللي جرا لي و اللي لا كان علي البال و لاعلي الخاطر, هموت هطق هنفجر,,,شحنه من الغضب تخليني اتحول للمعلم الكبير ابا الغضب في كرتوون مازينجر ,,,طب اولع في هذا الرجل او بمعني اصح هؤلاء الرجال ,,,,اصوت و يقولي الوليه اتجننت


؟؟؟؟؟؟؟؟؟؟؟؟؟؟؟؟؟؟؟؟


هتكلم اهوه يا خويا بالراحه اهو و النبي بالراحه انا هديت خلاص


؟؟؟


الحكاية


عااااااااااااااااااااااااااااااا العربيه اللي حلتي باظت العربيه اللي حلتي باظت بقت عشة فراخ


يحكي ان كنت ماشيه في الشارع بعربيتي الغير مؤمن عليها و افتكروا النقطه دي ,,,ذات الاقساط المتلتله و احفظوا دي ,,,التي بدورها تاخذ المرتب و دي طبعا مفهومه جدا,,,, اذا بي اجد سواق اتوبيس واقف علي محطته عادي جدا و علي الجانب الاخر من الطريق الضيق بطبعه عربيه تانية راكنه ,,,ما فيش مشاكل ,,,و واحد بيشتم سواق الاتوبيس اللي واقف عند المحطه زي ما ذكرنا سلفا و الولد بيكلم السواق من الشباك بتاع الاتوبيس يعني عايزاكم تتخيلوا المنظر الاتوبيس واقف يمين الولد بيكلمه و واقف في الشارع شمال الاتوبيس و انا جايه شمال الاتوبيس بسرعه لا تتعدي 20كيلو/ساعه

يعني شئ بديهي و عقلاني و بدون ادني شك لايمكن الاتوبيس هيتحرك لان في جثه ااااقصد بني ادم بيكلمه واقف قدام الاتوبيس

و اذا تم تم تم تششششششششششششششششششششششششش

بهذ الاتوبيس يتحرك من مكانه و بيزق الرجل بالاتوبيس يعني شخص واقف و سواق الاتوبيس بيتاخره بالاتوبييييييز

في دخلت مين

العبد لله اللهم لا اعتراض و لا مانع

لاقيتلك ايه بقي الواد اللي كان واقف و بيتكلم اتفعص ما بين عربيتي او اللي باقي من عربيتي و الاتوبيس,,, و الله و الله كان كيف البرص الحيران اللي مشعارف يروح فين من عصاية المقشه . منظر مفزع و في قمة الاكشنه و التراجيدي لما تلاقي واحد بيتفرتك ما بين عربيتك و اتووووووووووووبييييييييييس نقل عام كبييييييييييييييييييييييير مهزلة حقيقيه

قمه الفزع الانساني

الاغرب ان الواد بعد ما فكينا العربيه اللي بقت عجينه من الاتوبيس و ان الواد طلع سليم الحمد لله و مش عارفه ازاي بصراحه

طلع لسواق الاتوبيس و فش غله و ضربه لانه بدوره عارف انه مش هياخد حقه ,,,ليه بقي؟؟؟؟لان ده اتوبيس نقل عام

يعني الحكومه يا معلم يعني البلطجه و قلت الادب يعني ان محدش يتحرك غير لما نلاقي دم و ناس روحها طلعت يعني الواد فش غل امه في السواق و انا وقفت ألطم في الشارع علي عربيتي اللي بقت خرده و كان في واحد هيموت عليها و انا ماليش ذنب



يعني ايه سواق نقل عام يزق واحد بالاتوبيس عشان بيتخانق معه و اللي عرفته بعد كده ان السواق ده خبط عربية الولد لكن معملش حاجه كبيره فيها و طبعا لان الواد مش متربي نزل يمسح بالرجل الارض و طبعا السواق مش متربي اكتر منه او بمعني اصح مش بيفهم اساسا بيزقه بالاتوبيس ,, و اللي بدوره واحده زيي كانت في حالها و بتفكر زي باقي البشر ان لايمكن ان الاتوبيس يعمل كده كانت ماشيه عادي جدا لانها متصوره ان في الشارع المصري بشر

و اللي اتضح انه مش بشر عادي,,,, لا ده بقي فتوات و ناس عندها استعداد تضيع عمرها و عمر عيالها و اعمار الناس بسهوله

و اللي رحت القسم و اتبهدلت لحد الساعه واحده و نص باليل او صبحا ان صح القول بيتكتب محضر و مش هخد حاجه منه

و مش هستفاد و مش هيتاخد لي حقي
يعني الواد لما طلع ضرب سواق الاتوبيس اهو اتفش
طب انا اعمل ايه

اجيب رشاش و افرغه في دماغه بما اني بنت و مش هعرف اضربه ,,, اصوت و الم الناس عليا (و الله ما كانت محتاجه صوات ده امم كانت موجوده و لا يوم منتخب مصر لما كسب) انا ,,,انا اعمل ايه ,,,انا المواطن العادي يعمل ايه ,,,انا تعبانه انتم حسين بيا ,,تعبانه لدرجة اني مش عارف اكتب اقول عن مشاعري عامله ازي

ايه الحل عايزين حلول للي بيحصل ده يعني كده صعب اوي ,,,طب افرض ان الولد ده كان فضل يضرب في سواق الاتوبيس لانه عارف انه مش هياخد حاجه او ان حقه هيضيع و حصل ان سواق الاتوبيس هو اللي مات,,,كان ايه الحال بقي


فكرة انك تحس انك مش هتاخد حقك في ابسط الامور و ان الشارع المصري ياكل في بعضه كده حاجه مش طبيعيه
شئ غريب
عدد الشباب اللي حاسس بان روحه هينه عليه سواء شباب ابن ناس او سواق ميكروباص ده معناه ايه؟
فكرة ان الرجل سواق الاتوبيس بيزق بني ادم بالاتوبيس عشان يتاخره و يمشي دي معناها ايه؟

ان الولد ينزل و يمسح بكرامة الرجل الارض و اللي قد يكون بسبب خطا غير مقصود فعلا ده نسميه ايه؟

قلة ادب شعب ,,,ايه بقينا شعب مش متربي خلاص,,و لا غباء,,و لا قلة التغذيه و ارتفاع الاسعار خلت الناس جعانه فمفيش دماغ تفكر و اجيال طالعه متخلفه و عندها بلاده ذهنيه و بطء تفكير



دي كانت الحادثه الاولي



بعدها بيومين بالظبط و بالتحديد يوم الحد اللي فات 3-3-2008 يريد ربنا اني اقابل الاكثر من هذا تخلف بل و الاشنع لاته تخلف صافي,,,,,,,, تخلف مكرر كيف عسل النحل ,,,,, من واحد مفروض و نركز علي مفروض دي انه لا يحمل اي نوع من اواع التخلف


في شارع ارض المعارض اذا بي ماشيه بعد الحادثه الاولي في قمة التركيز عشان الغباء المحيط بيا
و فجاة يا اخواني فجاة اذا بان,,, الاشارة كانت مفتوحه عادي و مافيش مشاكل و مره واحده توووووووووووووووووووووت-صفارة-ذ

استوب!!!!!!! وقفنا!!!!!اترمي قدام العربيات عسكري المرور يوقفنا فجاه رغم ان الشارع فاضي و كل العربيات واخده سرعه عشان الاشارة مفتوحه و الشارع ده بطبعته سريع

العبد لله لحق نفسه علي اخر نفس بدل ما يلبس في العربيه اللي قدامه و وقفت

و اذا بشئ من- يعيييييييييييييييييييد نداني احم احم -اسفه شئ من بعيد بيجري و هوب طخ تش ميكروباص من نوع ترامكوا المعتبر رغم انه شايف الاشارة قفلت و انه كان عنده وقت انه يقف لكن من شدة السرعه ملحقش نفسه قوم يناشن علي مين؟؟؟؟ علي عربية الفقرية!!!!!,,,و اللي بدورها اتنطرت و لبست في العربيه اللي قدمها يعني عربيتي من الاخر اتخبطت من قدام و من ور وطبعا نفتكر الجنب اليمن اللي الاتوبيس داسه

و لولا ستر ربنا و اني بشوف مسلسلات اجنبيه كتير و متاثرة بيها بحط حزام الامان يعني مش عشان متاثرة بصراحه بقنون الشارع المصري


يعني ده يرضي ربنا؟؟؟؟؟ يعني ده ينفع؟؟؟؟؟ ممكن ده يكون في حته تاني في العالم ,,,ياجدعان الموضوع بسيط بالنسبه لحصار غازة و اعتصام العمال في مصر ,,,بس ده مش وارد اصلا انه يحصل مش مفروض في بلد زي بلدنا يكون في كده مش معقول ان بلد الخديوي اسماعيل تكون بالشكل ده

الله يرحمه الرجل ده كان منضفنا سواء في شوارعنا او جيوبنا بس احنا النهارده متنضفين في حاجه واحده بس جيوبنا
استغفر الله!!!!ذ

يعني ايه ان عسكري مرور يكون لسه لحد النهارده في شوارعنا و مافيش حاجه اسمها اشارة مرور؟؟؟
يعني ايه واحد يكون ماسك صفارة و بيرفع ايده وقت ما يحب و ينازلها وقت ما يحب او ينفحخ في الصفارة وقت ما يكون في عنده نفس و ما ينفخش وقت ما يكونش عنده؟؟؟
ايه؟؟؟؟

انا مش فاهمه

انا بس عايزه اقول ايه؟؟؟؟

و ليه؟ و كيف؟ و ماذا؟ و لماذ؟

و طبعا ما كان مني الا اني اجز علي ضروسي و انا بغني عني عَ الغباوة غباوة دي صنع بلدي و نجاوة نجاوة




Sunday, May 20, 2007

حكايه الالف ليه؟؟؟؟ليه؟؟ليه؟؟؟

انا بصراحه يا جماعه من كتر الزهق فكرت ليه ما نعملش مظاهره سلميه
ليه ما نقولش لا,,,,, ليه؟ ليه بنطلع نتكلم و نعمل مظاهرات عشان البلاد التانيه و احنا موكوسين
انا عمري ما طلعت في مظاهره ,بس عايزه اعمل مظاهره عشان يبطلوا ينزلوا اللبس المقرف ده للبنات, عايزه اعمل مظاهره عشان الشباب اللي مش عارف يتجوز,عايزه اعمل مظاهره عشان الفاصل الاعلاني
ليه ما نقولش لا علي بيع جامعه الاسكندريه
ليه الاسكندرنيه ما يصرخوش
ليه؟؟؟؟؟
ليه ما فيش مرور عدل في بلدنا ها ليه؟؟؟
ليه مافيش برامج ثقافيه صح ليه؟؟
بدل البرامج اللي عماله تفضح في القرف اللي عندنا
و تزود همنا
قال كده بيوعونا
و احنا حمير اصل او دمغنا فاضيه
ليه مافيش تعليم كويس ها
الرحمه بقي
لييييييييييييييه؟؟
ليه؟ ما نتكلمش ليه؟؟
مش قادره
حاسه و انا بكتب ان في الف حاجه فرماني
انا ممكن اروح في داهيه بسبب الكلمتين دول
بس مخنوقه
هطرشق
عايزه افضفض
عايزه اصرخ
عاااااااااااااااااااااااااااااااااااااا
عاااااااااااااااااااااااااااااااا
يا لاهويييييييييييييييي
اف
استريحت شويه
بس لسه في تاني
عاااااااااااااااااااااااااااااااااااااااااااااااااااا
بجز علي ضروسييييييييييييييييييييييييييييي

Saturday, May 12, 2007

اخس علي اللي عايز يتعلم فيكي يا دي الجامعه

جامعه اه ,,,جامعه ايه,,,, جامعه لأ
اللي ليه نفس يتعلم نسدهاله
و اللي عنده امل في بكره نحطمهله
و اللي عايز يبقي بني ادم لازم يعرف انه حمار
ده شعار جامعتنا المصريه
:(
حسبي الله و نعم الوكيل
تبدأ القصه يوم ما اتهفيت في عقلي و قلت انا عايزه ابقي بني ادم
انا خرجت من جامعه عين شمس, العيل اللي في ثانويه عامه بيفهم احسن مني
يبقي لازم اتعلم عشان نفسي
و فعلا
قررت اني اخد درسات عليا
لكن الدرسات دي طلعت سفلي مش عليا
حسبي الله
مشكلتي تتلخص في الاتي
انتوا عارفين طبعا ان اللي يلاقي شغلانه في ايامنا الكحلي دي يبقي امه دعياله
و انا امي واصله مع ربنا
واراد الرب اني اشتغل
و لكن كان نفسي برده اكمل دراستي
قلت و ايه المانع
ما ممكن الواحد يعمل كل حاجه,يدرس ويشتغل
لكن اللي مش ممكن ان شخص واحد يتواجد في مكانين في نفس الوقت
ده اللي بتطلبه مننا الكليه
اما انك تروح و تحضر المحاضرات الصبح عشان غيابك
رغم انها سنه تمهيديه و درسات عليا
و المعروف اننا ما بنصدق نخلص عشان نشتغل,
وان الدراسه محتاجه فلوس,
او انك تقعد في بيتكم احسن
لكن مزاج الدكاتره انهم يدوا المحاضرات بدري , عشان حضراتهم بيصحوا من الفجر و اغلبهم تجاوزوا الستين, و ده سستم حياتهم
يعني هي الناس دي ماشبعتش
اخدوا كل الخير بتاع كل حاجه
و سابوا لينا التلوث و القرف و الاوضاع المقلوبه
وكمان
مش عايزين يجوا علي نفسهم و يدونا فرصه اننا نبقي حاجه
حرام ده ولا لأ
حرام ان حلمي يضيع ولا لأ
حرام اني اتظلم مره في الزفت الثانويه العامة
و اجي ادخل كليه انا مش عايزها
و الاقي نظام عقيم اخر
و لما يجي الوقت للتحرر من كل ده
تيجي حاجه تاني تخنقني
بقيت اجز علي ضروسي هنفجر
كفايه بقي اوضاع غلط في جامعتنا
دي الجامعه! و دول الناس اللي بيحركوها
اللي هما مفروض انهم صفوة المجتمع
و المفكريين اللي بيحركونا
فين طه حسين يجي يتفرج علينا
فين الناس المحترمة اللي عملت الجامعه وكان اولاد الملوك العرب بيجوا يتعلموا عندنا
انا بعمل بصراحه تحقيقي كبير في الموضوع ده
و هوصل صوتي لاكبر ناس
و اللي فيكم مفقوع من حاجه في الكليه بتاعته و لا جامعه بتاعته يبعت لي
و نتكلم كلنا
نتكلم بجد في مصيرنا
انا مستنياكم

Monday, March 26, 2007

التناحه


التناحه

مش قادره افهم ليه التانحه اللي فيها الناس دي
بجد بفتكر و قتها سمير غنام في مسرحية المتزوجون و هو بيقول سبع سنين فول و اخد الكورس كامل
بحس ان ده اللي الناس فيه
كنت سايقه كالعادة بعربيتي الكحيانه و واحده راحت مصدره لي الطارشه و هي بتعادي
ادتني ظهراها بكل تناحه
و كنت هدهسها
لولا ان ربنا بيحبني و عايز اللي زيي ما يتبهدلوش

النتاحه في ان زميلي اللي في المكتب يفقعني مهموز يطلع من دماغي و يجي يمثل انه ما يعرفش حاجه
و طبعا و قتها جزيت علي ضروسي
و كنت هطرقع بس استهبلت زي ماهو استهبل
كان هيدخلني السجن علي رجلايا الله يخرب بيته
البني ادم التنيح
مش لاقيه بصراحه تعريف للتناحه يتكتب اويتقال يكفيك انك تبص علي الممثل ده اللي بيقول (الله) بخنفان بصراحه مش فاكره اسمه ايه بس كان قال ايه بيطلع علي انه كوميدي و ده من ضمن التناحه بتاعت المخرجين
التناحه من انسان يبص لك من فوق لتحت بتفصيل قمه في الملل و قلة الذوق و يكاد يكون نفسه في وشك (احم احم اففف)
سعدوني يا جماعه علي اني اوجد تعريف للتناحه لان المتنحين كتير حواليا

جازز علي ضروسي


Wednesday, February 14, 2007

لست كاهنه, لست ساحره لم احبو في تلك الدروب بعد فلا تطلبوا مني ما لا اطيق




مفروض اني اعيش حياتي كلها اخمن ايه اللي انتوا عيزينه
مفروض اكون غامضه زيكم عشان اعجبكم

مفروض ان اقرب ناس ليا في حياتي لازم افضل احسب الف حساب قبل ما انطق
مفروض اني اكون صندوق اسود

مفروض اني اكون عرافه او بقرا الطالع





تريد كاهنه و انا لم يكن لي في الكهن باب
بل كنت انت الكاهن في معبد قلبي
تخطو و تمرح دون حساب
انا لست كاهنه
لست ساحره
فلم احبو في تللك الدروب بعد
فلا تطلبوا مني ما لا اطيق






جازز علي ضروسي

Sunday, February 11, 2007

جازز علي ضروسي




ما كنتش اعرف ان ممكن حقيقي الواحد يتغاظ للدرجه اللي لما يجز علي ضروسه توجعه بالشكل ده


ما كنتش اتخيل اني الناس زباله كده


ما كنتش اعرف


ما كنتش اعرف ان الدنيا صعبه اوي اوي كده


ما كنتش اعرف اني طول عمري في الحضانه بالشكل ده


بصراحه البوست ده للغضب ,للأعتراض


للجز علي الضروس