جامعه اه ,,,جامعه ايه,,,, جامعه لأ
اللي ليه نفس يتعلم نسدهاله
و اللي عنده امل في بكره نحطمهله
و اللي عايز يبقي بني ادم لازم يعرف انه حمار
ده شعار جامعتنا المصريه
:(
حسبي الله و نعم الوكيل
تبدأ القصه يوم ما اتهفيت في عقلي و قلت انا عايزه ابقي بني ادم
انا خرجت من جامعه عين شمس, العيل اللي في ثانويه عامه بيفهم احسن مني
يبقي لازم اتعلم عشان نفسي
و فعلا
قررت اني اخد درسات عليا
لكن الدرسات دي طلعت سفلي مش عليا
حسبي الله
مشكلتي تتلخص في الاتي
انتوا عارفين طبعا ان اللي يلاقي شغلانه في ايامنا الكحلي دي يبقي امه دعياله
و انا امي واصله مع ربنا
واراد الرب اني اشتغل
و لكن كان نفسي برده اكمل دراستي
قلت و ايه المانع
ما ممكن الواحد يعمل كل حاجه,يدرس ويشتغل
لكن اللي مش ممكن ان شخص واحد يتواجد في مكانين في نفس الوقت
ده اللي بتطلبه مننا الكليه
اما انك تروح و تحضر المحاضرات الصبح عشان غيابك
رغم انها سنه تمهيديه و درسات عليا
و المعروف اننا ما بنصدق نخلص عشان نشتغل,
وان الدراسه محتاجه فلوس,
او انك تقعد في بيتكم احسن
لكن مزاج الدكاتره انهم يدوا المحاضرات بدري , عشان حضراتهم بيصحوا من الفجر و اغلبهم تجاوزوا الستين, و ده سستم حياتهم
يعني هي الناس دي ماشبعتش
اخدوا كل الخير بتاع كل حاجه
و سابوا لينا التلوث و القرف و الاوضاع المقلوبه
وكمان
مش عايزين يجوا علي نفسهم و يدونا فرصه اننا نبقي حاجه
حرام ده ولا لأ
حرام ان حلمي يضيع ولا لأ
حرام اني اتظلم مره في الزفت الثانويه العامة
و اجي ادخل كليه انا مش عايزها
و الاقي نظام عقيم اخر
و لما يجي الوقت للتحرر من كل ده
تيجي حاجه تاني تخنقني
بقيت اجز علي ضروسي هنفجر
كفايه بقي اوضاع غلط في جامعتنا
دي الجامعه! و دول الناس اللي بيحركوها
اللي هما مفروض انهم صفوة المجتمع
و المفكريين اللي بيحركونا
فين طه حسين يجي يتفرج علينا
فين الناس المحترمة اللي عملت الجامعه وكان اولاد الملوك العرب بيجوا يتعلموا عندنا
انا بعمل بصراحه تحقيقي كبير في الموضوع ده
و هوصل صوتي لاكبر ناس
و اللي فيكم مفقوع من حاجه في الكليه بتاعته و لا جامعه بتاعته يبعت لي
و نتكلم كلنا
نتكلم بجد في مصيرنا
انا مستنياكم
6 comments:
انا كمان كنت قدمت على دراسات عليا فى الجامعه عندنا
كليه التجاره جامعه المنصوره
بس بصراحه النظام عندنا كان مختلف
الدكاتره كانت عارفه ان كل الطلبه بتشتغل
فكانت المحضارات بتبدأ بعد الظهر
بعد مواعيد انصراف الموظفين
وده كان بيساعد ناس كتير
بس بصراحه انا اول مره اسمع عن دراسات عليا الصبح
مش عارفه الناس دى بتفكر ازاى
ربنا يكون فى عونك
تحياتى
ياه
البلد دي مفيهاش فايدة و لا اية؟
معلش يا فيروز
دي جزاء اللي عايز يتعلم كنتي طلعتي لعيبة كورة بالثانوية العامة كنتي اخدتي ملايين دلوقتي
تحياتي
تعالى اتفرجى على اللى انا فيييييييه
مواعيد بيبتدوها بمزاجهم و بينتهوها بمزاجهم
وكتب عجيبة و ساعات مش كتب هو ساعات سلايدز باور بوينت و انتهينا
ومواد البرمجة مفيش عملى
مش فاهمة برمجة نظرى ازاى
واكم و اكم .... اسكتى
ده بالاضافة لان امثالى من اللى عندهم شغل الصبح بيبقوا بيحبوا قوى ان موضوع الدراسات العليا ده مسائى
لااااااااا بس على مييين
اللى متجوزة و عايزة تلحق البامية قبل ما تتشال من السوق و العيال على الباب و اسافين للدكتور و بقدرة قادر الاقى المعاد بقى محصلش الظهر حتى
واللى بتدلع و طبعا المكياج هيسيح فى الحر و برضه تدخل تضرب اسافين و تغير المعاد لنفهسا فى الطراوة
وتكبيس محاضرات فى يوم واحد من اكتر من دكتور بدون مراعاة لان الحمار اللى هيستوعب ده ليه طاقة استيعابيه مينفعش يبقى فى شغله من صباحية ربنا و يبتدى من الساعة 3 و ياخد 3 محاضرات
وتقولى مش هينفع يا دكتور يقولك لا ان شاء الله هينفع
الصراحة الراجل قدم المشيئة
ابقى خارجة من الكلية قرب الساعة 9 لا و اسافر كمان
لنا الله
اى و الله لنا الله
Regards:
Lojain :)
يا عيني علينا
انا لسه مخلصة الكلية السنة دي وهقدم تمهيدي باذن الله وعندي نفس المشكلة
يا بنتى هم عاملين كللللل ده عشان مش عايزيننا نكمل في الكلية اصلا
المصاريف تزيد والمواعيد تبأى الصبح وغياب وحضور واللي مش عاجبه يخبط دماغه في اجدعها حيط
بمناسبة طه حسين طالما انتي جبتي في سيرته انا مش هاكتب علي موضوع الدرسات العليا بس هعلق علي موضوع الدكاتره و خيرة المجتمع الثقافي.
في دكتور في هندسة عين شمس كان بيطرد اي حد من محاضرته او معمله عشان مش لابس بنطلون مفهوش جيوب من ورا!!!!!!!!!! و كان كاتب كده في كتاب المعمل, لو لسه عندي هبعتلك صوره.
و ده ليه بقه, اصل البنطلون اللي مفهوش جيوب من ورا بيعتبر بنطلون رياضيي و مينفعش نخوش بيه الجامعه اصلاَ
لا و الله طب احلف كده,,,طب بالنسبه للطربوش ابو زر لو من غير زر ,,,ندوس علي الزر و الصورة تفر ,,,,اللهم لا اعتراض
Post a Comment